Malta għandha l-ewwel Bank Ġenetiku Nazzjonali, li qed iservi bħala repożitorju nazzjonali għad-diversità ġenetika tal-pjanti. Il-bank ġenetiku nazzjonali qed iservi biex jikkonserva u jiffaċilita l-aċċess għad-diversità ġenetika ta’ varjetajiet ta’ pjanti lokali, razez lokali, varjetajiet antiki, għelejjel slavaġ relatati u pjanti oħra slavaġ għall-użu f’attivitajiet ta’ agrikoltura, riċerka u konservazzjoni.

Il-faċilità se taħżen żrieragħ, kif ukoll tessut ta’ pjanti għal ħżin in vitro u krijopreżervazzjoni u tikkomplementa l-infrastruttura eżistenti fid-Direttorat għall-Ħarsien tal-Pjanti bħala l-Awtorità Kompetenti għar-Riżorsi Ġenetiċi għall-produzzjoni u l-ħżin ta’ żrieragħ artifiċjali. Il-bank ġenetiku se jkollu r-rwol li jiġġenera u janalizza d-diversità ġenetika għall-ġermoplażma maħżuna fil-kmamar tagħha, u għalhekk jimla lakuni kbar fl-għarfien tal-wirt ġenetiku nazzjonali tal-pjanti.

Id-disponibbiltà tal-ġermoplażma u bażi tad-data ġenetika se tikkontrobixxi għall-isforzi li jkunu qegħdin jitwettqu madwar id-dinja biex jikkontribwixxu għas-sigurtà tal-ikel kif ukoll l-iżvilupp ta’ varjetajiet ġodda li huma reżiljenti għal problemi komuni bħal nixfiet, salinità għolja fil-ħamrija, bdil fil-klima, tifqigħat ta’ mard, u effiċjenza nutrizzjonali, fost oħrajn.

Ara dan il-filmat, għal aktar informazzjoni dwar dan il-proġett.