F’2022, l-Anzjanità Attiva u Kura fil-Komunità inawgura klinika multidixxiplinari ġewwa Dar Padova, f’Għajnsielem, Għawdex bil-għan li taqdi aħjar lill-anzjani Għawdxin li jiġu bżonn servizzi kliniċi. Din id-dar ġiet rinnovata u attrezzata biex tkun tista’ sservi bħala klinika fejn jingħataw dawn is-servizzi.

Minn ġewwa din il-klinika, l-anzjani se jkunu qed jingħataw diversi servizzi li jinkludu:

• Servizz ta’ Teħid tad-demm (Flebotomija) – Servizz li se jkun ikkordinat bejn il-professjonisti tal-Flebotomija u l-CommCare. Dan se jiġi pprovdut minn infermiera skont il-bżonn
• Servizz tal-CommCare – Servizz ta’ assistenza medika lill-anzjani fil-kumdità ta’ darhom;
• Servizz ta’ Kontinenza – Assessjar minn professjonisti ta’ każijiet kumplessi ta’ inkontinenza. Dan se jkun qed isir b’kollaborazzjoni mal-Ministeru t’Għawdex;
• Tim ta’ intervent tad-Dimensja – Dan it-tim jipprovdi servizz fil-komunità lill-persuni bid-dimensja u lil dawk li jieħdu ħsiebhom. Ser issir valutazzjoni ħolistika tas-sitwazzjoni tal-persuna bid-dimensja u ta’ dawk li jkunu qed jieħdu ħsiebhom. Dawn il-klijenti se jibqgħu jiġu segwiti fir-residenzi tagħhom;
• Ċentru għal persuni bid-dimensja ta’ matul il jum – Dan iċ-ċentru jgħin lil persuni bid-dimensja li jattendu dan iċ-ċentru billi jipprovdilhom attivitajiet terapewtiċi. Fl-istess waqt ikun qed itaffi ftit mill-piż lill-familjari tagħhom;
• Servizz ta’ Psikoterapija – Servizz li jagħti sapport psikoloġiku lill-anzjani li jkunu għaddejjin minn żmien diffiċli kif ukoll lill-persuni li jkunu qed jieħdu ħsiebhom;
• Clinical Nutrition – Servizz ta’ gwida lill-persuni anzjani dwar l-ikel addattat għalihom skont il-kundizzjoni tas-saħħa tagħhom. Dan is-servizz se jkun qed jingħata b’kollaborazzjoni mal-Clinical Nutrition tal-isptar Mater Dei;
• Klinika Vaskulari – Dan is-servizz sejjer jinkludi visti speċjalizzati minn kirurgi vaskulari, podoloġisti u tissue viability nurses;
• Servizz ta’ Allied Health – servizzi varji li se jingħataw minn podoloġisti, occupational therapists u dietisti;
• Silver-T – servizz ta’ trasport bla ħlas li se jkun qed jingħata lill-anzjani f’Għawdex. Sejrin nipprovdu trasport lil dawk l-anzjani li jkollhom bżonn jattendu għall-appuntament ġewwa il-klinika f’Dar Padova, kif ukoll transport għall-postijiet essenzjali oħra bħall-fergħat tal-banek, u supermarkets.
• Night Shelter – Dan is-servizz joffri kenn għal matul il-lejl lill-anzjani li jgħixu waħedhom jew li għal raġunijiet diversi, iħossuhom insikuri f’darhom.